گئجه نی صوبح ائیله ییب دیر , چیخیب ائودن ,
آلاتوردان , یازیق اینسان , چوخ هراسان , گینه بو شهریمیزین بهلولی یارب,
باشینی تیکمیش اشاقه, قوتین سالمیش ایاقه, کورکی چیگنینده, همان کورکی کی,
گوندوزلرینین پالتاری, آمما گئجه لر یورقانی اولموش, سانکی شیرین جانی
اولموش, گئدیر آنجاق هایانا, کیم نه بیلیر هئچ دئمگ اولماز, او کی هر کسله
دانیشماز, او اگر کوسسه باریشماز, مال دونیایه ساریشماز, اونا دونیاده
یانان یوخ, اورگینده قالانان دردی قانان یوخ, بیر نفر یاده سالان یوخ,
هاینیا بیر ده قالان یوخ.
او بیر اینسان دی پوزولموش آدی اینسانلار
ایچیندن, دیری دیر آمما اولوبدور, همی آجدیر, همی توخدور, باخیشی زهرلی
اوخدور, همی واردیر همی یوخدور, دئیی سن واردیر, هانی دفتر آماریده آدی,
هانی قندیله نباتی, هانی یاغی, هانی یانماغه چراغی, هانی بس ایستی اوتاقی,
هانی آروادی اوشاقی, نییه بس کوردی اوجاقی!
وارسانیرسان, دءگوروم ایستیه
کوچ ائیلیه بیر گون بو جهاندان او جهانه, باشی نین اوستده او گون
آغلیاجاقسان؟اونا یاس ساخلیاجاقسان؟باجی وار باشینی یولسون؟دوستی وار
گوزلری دولسون, بالا وار گول کیمی سولسون؟آتا واردیر اره ییب شام کیمی
هجرینده سو اولسون؟او بیر اینساندی بئزیکمیش هامی اینسانلار الیندن, بیر
نفر اینجی یه, حاشا نه الیندن نه دیلیندن, گئری توشموش اوز ائلیندن,
آتالاردان, بابالاردان, بیز اوچون یاخشی نشاندیر, اوزو بهلول زماندیر,
سوزلریندنده عیاندیر, ده لی دیر پالتاری جیرماز, ده لی دیر باشه چیغیرماز,
ده لی دیر بیر کسی وورماز, دهلی دیر آمما تاری لان توخونان رشته نی قیرماز,
آمما گاهدان تاریا شیلتاق ائدر خیردا اوشاق تک, پنیرین قارقا آپارسا, یا
اوشاقلار داشا باسسا, اوزو بیگلر اله سالسا, اوندادیر ترسه باخار ماوی
سمایه, ترپه نیر دیل دوداقی آمما سسی آشکارا چیخماز.
نئجه کی بیر دونه
آخشام چاغی من ناظر بیر صحنه سی اولدوم, آز قالیردی که بیزیم انقلابین
شانلی آغاجی بارا دولسون, گونش آچسین, ایشیقین عالمه ساچسین, آغ گویرچین
قفسین سیندیراراق قول قاناد آچسین, کی بیر افسر بئله بیر دردلی بیر اینسانی
غضب سیلی سینه بیر گئجه مهمان ائله دی, بلی دونیا بئله دی, بئله بیر قورقو
کی ایللر بویو ائیلردی بیزلره شاهلار نظامیندا, زورلی زورسیز آیامیندا,
باج آلانلار اینامیندا, حقه باطل دئیوبن باطلی حق جلوه وئرنلر, اوزو قورد
آمما قویون پالتاری خلق ایچره گیه نلر, قونشوسی آج یاتوبن اوزلری بئش وعده
ییه نلر, مرده نامرد دییه نلر, بئله بیر قورقونو ائتمیشدیله بو ملته حاکم,
نه عدالت!نه محاکم! اونا بیر سیلی ووروب قهریله بیچاره ییخیلدی, اوره گیم
یاندی سیخیلدی, دوردو یئردن آیاغا کورکونو اوز چیگنینه سالدی, اونا بیر سوز
دیوبن هامی نین آرامینی آۀدی, دردی درد اوسته قالاندی, دای سکوت ائیله
مییب نوطقه گلیب صبری تالاندی, دئدی یئر گویده یالاندی؟
سیل گوزون باخ
گیله دیقتله گویه, گور نه گورورسن, باخ گور اولدوزلاری خلق ائیله ین آللاه
نه نه سئویر, سن نه سئویرسن؟او قارانلیق گئجه ده نور ساچاندی, باغلی
یوللاری آچاندی, گونشین آۀ یاناقی پارلیر اوفوقلرده آچاندی, داها ظولمات دا
قاچاندی, اوقدر اولدوزا صاحب منی دوگمور, ایکی اولدوزلا دوگورسن؟بونه
ایشلردی گورورسن, بو نه دونیا دی سئویر سن, نه چوره کدیر کی یئییرسن, بونو
سن بیلمه لی سن هر الین اوستونده بیر ال وار, هامی معلوله علل وار, هر
عمارت کی اونو ظلم الی تیکدی, اونا آخر ده خلل وار, دوز یولوندان سن آزیب
سان, اوزووه گور قازیبسان, نه قدر قدرتون اولسا, گینه مندنده یازیق سان,
یازیق اینسان!اولدوزون سهل دی باشوندا مرصع تاجون اولسا, میللتی سویماقا
مینلر باج آلان لیلاجون اولسا, زور دئییب وورماقا سینسیتمگه من تک آجون
اولسا, قالانان نفرتیمیز سینه ده فریاد اولاندا, سسی دونیایه دولاندا,
دوشمانین دا من دیوانه کیمین رنگی سولاندا, آییلارسان نه آییلماق, او
آییلماق هئچه دگمز.
سوزومو قیسساتمالیام اوستونو چیرپیب یولا دوشدو,
آمما لاپدان دایانیب توتدو اوزون افسره ساری, بیر گوزل شعریله آلدی هامی
نین صبر و قراری, سانکی بیر قارتالیدی چیگنینه چالمیشدی شکاری دئدی :
« تقدیر و قضا قوت بازوئیله دونمز / بلی, بیر شمع کی حقدن یانا هئچ بادیله سونمز »
منده
سوز دفترینی باغلایاراق گئتمه لی اولدوم, سیزه فاش ائتمه لی اولدوم, کی
منیم شعریمین انگیزه سی شیخ ممدیمیز, بهلول ثانی, او وداع ائتدی جهانی,
آختاریب تاپدی بقانی, عومرونون سون چاغی چیگنینده اولان کورک جیریلدی, اونو
دلبسته ائدن وارلیقا تک رشته قیریلدی, حق دانیشدی اودو بو شهریده دیوانه
ساییلدی, خیردا بیر داخما اونا خانه و کاشانه ساییلدی , اوزو اینسان, ولی
اینسانلیغا بیگانه ساییلدی, اغنیا پول گوجونه دهریده فرزانه ساییلدی, باده ی
حق دن ایچن لایق میخانه ساییلدی, عارفین عرفی خطا, عالم عرفانه ساییلدی,
زاهدین صدق دیلی ریبیله هم خانه ساییلدی, شاعرین شعری خلاف ائتدیگی پیمانه
ساییلدی, فاسقین فسقی نه دن همت مردانه ساییلدی؟یوخ تعجب یئری « عاصم » کی
طبیعت قوروشوندا, گنج پنهانه مکان گوشه ویرانه ساییلدی.
تاریخ امروز :
آمار مطالب
آمار بازدید
