تبلیغات
وطنیم ایران.آنا یوردوم آذربایجـــــــان - بیر کند مکتبی­نین آلین یازیسی !
 
آخرین مطالب
 
پیوندهای روزانه
بیر کند مکتبی­نین آلین یازیسی !

   بیر کند مکتبی­نین آلین یازیسی ! 

                                  

  یازان:  مهندس حسن راشدی  1379 – جو  ایل  

پیشیک شکیل­لی ایران خریطه­سینین ساغ قولاغی­نین اوجوندا، جنوبی 

آذربایجانین موغان منطقه­سینده و شمالی آذربایجانین لاپ سرحرینده، 

کئچمیش «گئرمی» قصبه­سی و ایندیکی «گئرمی» شهری­نین 30 

کیلومتر شرقینده «موران» آدلانان ماحالدا قیرخ ائولی بالاجا بیر کند 

یئرلَشیر!

آردین اوخو

بو کنده اهالی آراسیندا «زاهرا»، دولتی سندلرده ایسه «زهرا» 

دئییلیر.

لاکین بئله نظره گلیر بو کندین آدی ایکی یوز ایل حدودوندا بوندان قاباق 

ایلک دفعه بو کندده یورد سالان و بو گونکو زاهرالیلارین باباسی ساییلان 

«ظاهر آلی» (ظاهر علی) آدیندا کیشی­نین آدیندان گؤتورولموشدور.

ظاهرآلی­نین «طاهر» آدیندا اوغلو اولموش و طاهرین   «ایمان آلی» 

(ایمانعلی) و «همت» آدیندا ایکی اوغلو اولموش کی، بو گونکو زاهرا 

کندینده یاشایان آشاغا باشلیلارلا یوخاری باشلیلارین بابالاری 

اولموشلار 

بئله تصور اولونور بو گونکو «زاهرا» آدینی داشییان کندین آدی، ایلک دفعه 

«ظاهر آلی کندی» آدی ایله تانینمیشدیر، و بو کندین اهالیسیندن 

سوروشدوقدا هارالیسان؟ «ظاهر آلی­لییام»  دئمیشدیر.

آنجاق زامان کئچدیکجه سوزون قیسالمیش و آسانلاشمیشی دیللرده 

گزمیش و «ظاهر آلی­لییام» یئرینه «ظاهر آلییام» دئییلمیشدیر!

«ظا» حرفی ایله «ز» حرفی­نین دیلیمزده بیر جور سسلنمه­سی اوزوندن، 

اوزون زامانلار بو افاده ذهنلرده «زاهرالییام» کیمی یئرلشمیشدیر؛ و 

نهایت رضاشاه دؤورونده کنده رسمی آد قویماق اوچون سند یازان اداره 

مأموری، بو آدی «زاهرا» سوزوایله، «لی» منسوبیت شیکیلچی­سیندن 

تشکیل تاپمیش «زاهرالی­یام» کیمی دوشمونموش و «زاهرا» سؤزو 

 فارس دیلینده «زهرا» کیمی سسلندیگیندن بو کنده «زهرا» آدی 

وئرمیشدیر!

«زاهرا» کندی، موران ماحالیندا ایلک دولتی مکتبه مالیک اولموش کند دیر.

قیرخ ائولی «زاهرا» کندینده­کی قیز – اوغلان ابتدایی، راهنمایی و 

دبیرستان مکتب­لری­نین، موران منطقه­سی اوشاقلاری­نین ساوادلانماسیندا 

مهم رولو اولموشدور و بو کند مکتبینده درس اوخوموش چوخلو حقوقی، 

فرهنگی، نظامی و سیاسی شخصیت­لر، جامعه­میزه تحویل 

وئریلمیشدیر.

ایلک دفعه 1325 – نجی هجری شمسی ایل، سیدجعفر پیشه­وری 

باشچیلیق ائدن دئموکرات فرقه سی طرفیندن بو کندده دولت مکتبی 

تیکیلمیشدیر ، لاکین مکتب بیناسی­نین تاوانی (سقفی) اؤرتورلمه­میش، 

نهضت، پهلوی حاکیمیتی طرفیندن بوغولموش و مدنیت دوشمنی اولان  

پهلوی مامورلاری، مکتب بیناسینی پیشه­وری دؤولتی طرفیندن 

تیکیلدیگینه و بو مکتب ده آنا دیلیمیزده درس اوخوماق برنامه­سی نظرده 

توتولدوغونا گؤره مکتبی داغیدیب ویران ائتمیشلر ! !

هله او  ایل،  زاهرا کندینده ایلک مکتب بیناسی تیکیلدیکدن علاوه 

مورانین بوتون کندلرینده ابتدایی- مکتب بیناسی تیکیلمه­سی پلانی دا 

اعلان اولموشدور.

مکتب بیناسی، «زاهرا» کندینده پهلوی مامورلاری طرفیندن داغیلدیقدان 

سونرا کند اهالیسی اوشاقلاری­نین ساوادلانما ضروریتینی هر مسئله­دن 

اوستون گؤره­رک یوخسوللوقلارینا باخمایاراق او گونکو «گئرمی» 

«قصبه­سینده مشهور اولان «کِلکی» معلم یانیندا دؤرد کلاسلیق درس 

اوخوموش «حسن زارعی» نی خصوصی بیر معلم کیمی کنده 

گتیریب، اوشاقلارینی اونون یانیندا درس اوخوماغا قویموشلار .

حسن زارعی یانیندا درس اوخویان هر بیر اوشاق آی باشیندا ایکی 

تومن نقد پول، درس ایلی­نین سونوندا ایسه  ایکی کؤووز (دؤرد باتمان

= 64گیروانکه  =  24 کیلو) بوغدا، درس حاققی وئرمه­لی ایمیش !

بیر ایل مکتب بیناسی داغیلدیقدان سونرا، کند اهالیسی، «حسن 

زارعی» نین کؤمکی ایله یئنی­دن کندده دؤولتی مکتب قورولماسینا، 

پهلوی دؤولتینه عریضه یازمیشلار.

تکرار عریضه­لردن سونرا نهایت 1327 – نجی ایل دؤولتی مکتب           

  «دبستان بیرونی» آدی ایله کنده وئریلمیشدیر.

مکتب بیناسینی تیکمک اوچون، دولت، اهالی­دن 20 ×40 مترمربع­لیک یئر 

ایسته­میش ، بینانین تیکیلمه­سینی ده کند اهالیسی­نین اؤز عهده­سینه 

بوراخمیشدیر.

زاهرا کندی­نین اهالیسی 20 ×40 مترمربع لیک یئرینه ایکی برابر یئر 

وئریب بینانین تیکیلمه­سینی ده عهده­لرینه آلماغی قبول ائتمیشلر.

ایشه سرعت وئرمک اوچون قونشو کندلرین کؤمگی ایله مدرسه 

بیناسی­نین تیکیلمه­سی باشلانمیشدیر، «سالالا»، «کوردلر» (محلی 

آدی کوتلر، کوتدر)، «کالانسورا»، «زاهرا»، «سیدلر» و «تزه کند» 

اهالیسی­نین یاردیمی ایله دؤرد اوتاق بیر دهلیز و یا منطقه اهالیسی­نین 

دیلیندن دئسک دؤرد گؤز بیر دهلیز تیکلمیشدیر.

بو  اوتاقلار  و یا گؤزلر تیکیلیب حاضیرلانانا قَدَر ، ایکیسی بیر یئرده درس 

وئریلن بیرینجی و ایکینجی کلاس ، موقتی اولاراق کند ائولری نین 

بیرینده قورولموش و  بو اوتاقلار و یا گؤزلر تیکیلیب حاضیرلاناندان سونرا 

درسلر یئنی مکتب بیناسیندا داوام ائتمیشدیر.

1327- نجی ایلدن رسمی باشلانان درس کلاسلاری ایلده بیر صینیف 

آرتیب 31- 1330 – نجی درس ایلینده و دؤردونجو کلاسدا دایانمیشدیر.

یئنه  34- 1333  – نجو درس ایلیندن بیر نئچه آی کئچمیش، بئشینجی 

صینیف ده  کند مکتبینه آرتمیش  و گئرمی ده بئشینجی کلاسی 

اوخویانلار کنده دؤنوب کند ده تحصیل­لرینه داوام ائتمیشلر.

سونرالار ، آلتینجی صینیف­ده درس کلاسینا آرتمیشدیر و زاهرا کندی­نین 

ابتدایی مکتبی 1357 – نجی ایله قدر داوام ائتمیشدیر.

حسن زارعی معلمین، زاهرا کندینه دؤولتی مکتب آلماقدا مهم رولو 

اولموشدور. لاکین دؤولتی مکتب کنده گلدیکدن سونرا حسن زارعی 

داها بو مکتبده درس وئره بیلمه­میشدیر. او واختلار دؤولتی مکتب ده 

درس وئرمک اوچون آلتی کلاسلیق درس اوخوموش هر بیر کس ابتدایی 

معلمی اولا بیلردی حالبوکی، حسن زارعی یالنیز دؤرد کلاس درس 

اوخوموشدو!

زاهرا کندی­نین ایلک رسمی و دؤولتی مکتبی­نین معلمی آلتی کلاسلیق 

درس اوخوموش اردبیللی «لطیف اصغری» اولموشدور؛ ایکینجی 

معلم ایسه اردبیلین «نیر» قصبه­سیندن اولان او دا آلتی کلاسلیق 

اوخوموش «رمضان آقازاده» اولموشدور.

بو کند مدرسه­سینه اوچونجو معلم اردبیل کندلریندن اولان و دوققوز 

کلاس درس اوخوموش «مدّرس» آدلی و دؤردونجوسو اردبیللی 

«اخوان» آدلی معلم گلمیشدیر.

1338 – نجی ایل ایلک دفعه اولاراق دبیرستان دیپلومو آلمیش مرندلی ایکی معلم، «ابراهیم زاده» و «مالک اعاشه خواه» بو کنده معلم گلمیشلر؛ مرندین زونوز کندیندن اولان مالک اعاشه خواه 1355- نجی ایله­دک و 17 ایل بو کند ده معلم و مدیر وظیفه­لرینده چالیشمیشدیر.

زاهرا کندینده، قونشو کندلر یاردیمی ایله مکتب اوچون تیکیلن اوتاق و یا 

گؤزلر سونرالار اؤزلرینه آد صاحیبی اولموشلار، مثلاً سالالا کندی­نین 

اهالیسی طرفیندن تیکیلن اوتاغا «سالالا گؤزو»، کوٍردلر کندی 

طرفیندن تیکیلن اوتاغا «کوردلر گؤزو» و کالانسورالیلار یاردیمی ایله تیکیلن اوتاغا«کانسورا گؤزو» دئییلردی!

اوچ بالاجا کند، «زاهرا»، «سیدلر» و «تزه کند» لیلر کؤمگی­ایله 

تیکیلن بیر اوتاق بیر دهلیزه هئچ بیر آد دئییلمیردی؛ بلکه اوچ کندین 

آدینی بیر یئرده گتیرمک چتین اولدوغوندان و یا بو اوتاقلاری بیر کندین 

آدینا تانیماق انصاف­سیزلیق اولدوغو اوزوندن، بو بیر گؤز بیر دهلیز اؤزونه 

باشقالاری کیمی معین آد قازانمامیشدی!

مثلاً  زاهرا کندینده درس اوخویان مدرسه اوشاغیندان سوروشاندا 

مدرسه ده هانسی گؤزده اؤتورورسان؟ دئییردی: «سالالا گؤزونده» و 

یا «کوردلر گؤزونده».

اوچ کندین یاردیمی ایله تیکیلن اوتاقدا اوتوران مکتب اوشاغی بعضی 

واختلار لازیم گلنده زاهرالیلار تیکن گؤزده (دئمه­لی زاهرا و ایکی باشقا 

کند) اوتوردوغونو ایضاح ائدیردی .

کالانسورا گؤزو ایسه مکتب دفتری اولموشدو.

1327- نجی ایلدن باشلانان زاهرا کندی­نین مکتبی 1357- نجی ایله­دک 

ابتدایی مکتب حددینده قالمیش بو ایلده ، راهنمایی کلاسی دا بو کنده 

وئریلمیشدیر.

1349- نجو ایله­دک زاهرا کندی­نین مکتبینده یالنیز اوغلانلار درس اوخویور، 

قیزلار ایسه ساوادسیز قالیردیلار. دؤولت ایسه اوغلانلاردان آیری، قیز 

مکتبی قورماغا هئچ بیر ایمکان یاراتمیردی، نهایت کند اهالیسی، 1349- 

نجو ایل قیزلارلا اوغلانلارین بیر مکتب ده و بیر یئرده درس اوخوماسینا 

تصمیم توتموشلار !

هله اوغلانلارلا قیزلارین اوشاق یاشلاریندا اولدوقلارینا باخمایراق قیزلا 

اوغلانین بیر یئرده درس اوخوماسی کند عادت و عنعنه­سی ایله اویغون 

گلمه­دیگی اوچون اطراف کندلیلر قیزلاری­نین آدلارینی مکتبه یازدیرماقدان 

چکینمیشلر، لاکین زاهرا کندی­نین قیزلاری مکتبه آد یازدیردیقدان سونرا 

اطراف کندلیلرده قیز اوشاقلارینی بو مکتب ده اوخوتدورماغا ماراق 

گؤسترمیشلر !

بو کندده 1361- نجی ایل اوغلانلار اوچون ادبیات رشته­سینده دبیرستان، 

و 1367 – جی ایل قیزلار اوچون اوغلانلاردان آیری راهنمایی مکتبی 

آچیلمیشدیر؛ 1370 – جی ایل ایسه قیزلارادا ادبیات رشته­سینده 

دبیرستان مکتبی آچیلیب درس وئریلمیشدیر.

54 ایل قاباق، قیرخ ائولی اهالیسی اولان و موران منطقه­سینده ایلک 

دفعه ابتدایی، راهنمایی و دبیرستان مکتبینه مالیک اولان «زاهرا» 

کندی، ایندی ده قیرخ ائولی­دیر!

تحصیلاتلاری ایله علاقه­دار و یا کندین چتین اقتصادی شرایطیندن 

آسیلی اولاراق بو گون ائو- ائشیک صاحیبی اولوب عائله تشکیل 

ائتمیش زاهرا کندی­نین اهالیسیندن قیرخ ائودن چوخ تهراندا و همین 

تعداددا اردبیل، پارس آباد، مازندران و باشقا شهرلرده یاشاماقدادیرلار.

52 ایل بوندان قاباق و 1327- جی ایلده زاهرا کندی و قونشو 

کندلیلرین تلاشی ایله چیک- کرپیچله تیکیلن دؤرد گؤز بیر دهلیز 

مکتب تیکینتی­سیندن، و داها دوغروسو آیدین فیکیرلی زاهرا 

کندی­نین اهالیسی طرفیندن چوخ چتین­لیکله اله گتیریلن ایلک 

مکتب بیناسیندان، ایندی یالنیز بیر تورپاق تپه، نشانه قالیبدیر!

هله 1350- نجی ایل، ایلک دفعه قیرمیزی کرپیچدن تیکیلن ابتدایی 

مکتب بیناسی دا ویران- قالماقدادیر؛ بیر ایل قاباق شدتلی یئل     

نتیجه­سینده شیروانیسی قوپاریلان بو مکتبین تاوانی هله ده تعمیر 

اولمامیشدیر!

مکتب مسئوللاری­نین دئدیگینه اساساً، اونون تعمیرینه بودجه 

وئرن یوخدور! لاکین بو ویران قالماقدا اولان بینانین آلتیندا زاهرا 

کندی­نین  بالاجا اوشاقلاری سویوق قیش هاواسیندا و یاغیش 

دامجیلاری آلتیندادا تحصیل آلماقدیرلار، آخی اونلارین آتا- 

بابالاری چوخ زحمتله دؤولتی مکتب آلمیشلار ؛ اونلار آتا-  

بابالاری­نین ایلک دؤولتی مکتب آلماقدا چکدیکلری زحمتلرینین 

ماجراسینی یاشلیلاردان ائشیتمیشلر ؛ اونلار چتین گونلره 

دؤزمه­یی ده آتا- بابالاریندان اؤیره­نمیشلر ! !



می توانید دیدگاه خود را بنویسید
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.
 
http://uupload.ir/files/vfql_%D8%AA%D9%84%DA%AF%D8%B1%D8%A7%D9%853.jpg